Во сообраќајна несреќа кај Варшава загина докторката Емилија Котевска Аврамчева, жената која помогна пациенти од Кочани да се лекуваат во Полска

Македонската заедница во Полска и дипломатските кругови се простуваат од докторката Емилија Котевска Аврамчева, која трагично го загуби животот во сообраќајна несреќа на експресниот пат С8 во близина на Варшава.

Од Македонската амбасада во Полска соопштија дека станува збор за личност која оставила длабока трага во македонската заедница и која со години била еден од нејзините најсилни столбови.

— реклама —

„Д-р Емилија беше личност со извонредна енергија – успешен доктор, менаџер и претприемач, но пред сè човек целосно посветен на македонската кауза во Полска. Таа секогаш беше подготвена да помогне и имаше значајна улога во поврзувањето на македонската заедница“, се наведува во објавата на Амбасадата.

— реклама —

Оттаму потсетуваат дека таа неодамна донирала средства за изградба на спомен-обележје во Полице, град кој бил собирен центар за децата-бегалци од Егејска Македонија во 1949 година. Амбасадата истакнува и дека Котевска Аврамчева одиграла клучна улога во обезбедувањето лекување во Полска за двајца пациенти од трагедијата во Кочани, користејќи ги своите бројни контакти во полските институции.

Според информациите од полските медиуми, несреќата се случила во петокот околу 15:50 часот на експресниот пат С8, во близина на клучката Опач-Колонија. Котевска Аврамчева го запрела својот автомобил на лентата за итни случаи, а по излегувањето од возилото во неа удрил автобус.

— реклама —

На местото веднаш пристигнале противпожарни екипи, Итна медицинска помош и хеликоптер на Воздушната амбуланта. Лекарите извршиле реанимација и ја пренеле во болница, но полицијата вчера соопшти дека 72-годишната жена им подлегнала на повредите во раните утрински часови.

— реклама —

Надлежните институции во Полска продолжуваат со истрагата за да ги утврдат точните околности под кои се случила несреќата.

„За македонската заедница во Полска ова е ненадоместлива загуба. Таа беше симбол на поврзаноста и единството на Македонците во оваа земја“, порачаа од Македонската амбасада во Варшава.