Али Ахмети нема да се повлече од претседателската функција во ДУИ, барем засега, бидејќи во партијата нема расположение за таков потег, изјави Блерим Беџети во гостувањето во поткастот „Претрес со Ландов“.
На прашањето дали Ахмети размислува да се повлече од лидерската позиција, Беџети рече дека тоа е лична одлука на Ахмети, но нагласи дека во партијата нема расположение тој да се повлече.
„Кога ќе се повлече, тоа е негова лична одлука, бидејќи во партијата нема такво расположение за он да се повлече“, рече Беџети.
Во однос на можноста за повлекување на Муса Џафери, Беџети посочи дека неговата политичка функција не е поврзана со функцијата на Ахмети.
„Муса Џафери е пратеник на ДУИ на Европскиот фронт, и толку. Како што сум јас пратеник и другите колеги“, рече Беџети.
Тој додаде дека Ахмети одлуките во партијата не ги носел сам, туку преку партиските органи, каде што свој придонес имале и други функционери, меѓу кои и Џафери.
Во дебатата беше отворено и прашањето дали Ахмети го одржал зборот дека ќе се повлече доколку ги изгуби парламентарните избори.
Беџети оцени дека Ахмети ги добил изборите, а дека актуелната влада е формирана откако, според него, Христијан Мицкоски не го испочитувал гласот на албанскиот електорат.
„Господинот Ахмети ги доби изборите“, рече Беџети, посочувајќи на бројот на освоени гласови и пратенички мандати.
