СЛЕДЕТЕ ВО ЖИВО:
Четвртата сезона на „Претрес со Ландов“ започнува вечерва со Блерим Беџети, пратеник од Европскиот фронт, поранешен министер за правда и поранешен градоначалник на Сарај. Тој е првиот функционер на ДУИ што гостува во „Претрес“.
Во разговорот се отвораат прашањата што со години ја следат партијата која повеќе од две децении беше дел од власта: од падот на ДУИ и обидите за враќање, до одговорноста за состојбата во судството, институциите и државата.
Беџети ќе одговара за Али Ахмети и најавите за негово повлекување, за улогата на Муса Џафери, Артан Груби и Рамиз Мерко, за односите со Изет Меџити и ВЛЕН, но и за тоа кој би можел да ја преземе партијата по Ахмети.
Пред него се и прислушуваните разговори во кои се зборува за избор на претседател на Врховниот суд, за „наши“ судови и обвинителски места, како и за наводното политичко влијание врз Судскиот совет. Ќе се разговара и за постапувањето во предметот „Монструм“, односите со Сашо Мијалков, Никола Груевски и Зоран Заев, како и за прашањето кој навистина ги носел клучните одлуки додека ДУИ и СДСМ владееја заедно.
Тема е и кривичната пријава против Беџети, поврзана со сомнение за овозможување незаконска корист за фирми во износ поголем од 42 милиони денари. Ќе биде прашан дали станува збор за политичка конструкција, како што тврди, и дали би се повлекол од пратеничката функција доколку против него биде поднесено обвинение.
Во „Претрес“ ќе се отвори и прашањето за компанијата за изградба на станбени и деловни објекти што ја основаа неговите деца. Сопственичка е неговата 21-годишна ќерка, а управител е 19-годишниот син. Беџети ќе одговара од каде потекнува почетниот капитал и дали како долгогодишен функционер им помогнал со контакти, информации или институционални врски.
На маса се и американската црна листа, односот на ДУИ со САД, поддршката за Хашим Тачи, Законот за употреба на јазиците и протестите пред одлуките на Уставниот суд. Ќе се разговара и за националистичкиот наратив, поделбата на „наши“ и „ваши“ и честото претставување на барањето политичка одговорност како напад врз Албанците.
По дваесет години власт, ДУИ денес бара нови избори и најавува враќање. Но пред тоа доаѓаат прашањата: кој ќе одговара за гревовите, кој го контролирал судството и дали зад тврдењето „удираат по нас“ всушност се крие стравот дека се удира по функциите и привилегиите?
Следете го „Претрес со Ландов“ во живо во продолжение.
