Историскиот музеј во Крушево го отстапил споменикот „Илинден“, познат како Македониум, за снимање музички спот на косовскиот рапер Дон Џони, за што, според изјавата на директорот на музејот, бил наплатен надомест од 500 евра за неколкучасовно користење на просторот.
Станува збор за спот за песната „Секси мама“, во кој раперот се појавува и во дел од кадрите снимени во Македониумот. Случајот предизвика реакции во јавноста поради значењето на објектот, кој е еден од најпознатите меморијални комплекси во земјата и симболично место поврзано со македонската историја.
За оваа тема зборуваше и актерот Александар Михајловски во гостувањето во подкастот „Претрес со Ландов“, каде што го коментираше снимањето на спотот и начинот на кој Македониумот бил искористен како локација.
„Мислам дека стварно е тотално непотребно. Можеби го замислиле од уметнички аспект и концептот да биде некое место коешто е не секојдневно, нели, меѓутоа не сметам дека тоа е местото. Е сега, од друга страна, многу ми е криво што луѓето така секогаш реагираат за такви работи, многу побурно и повеќе, а за некои посериозни проблеми“, вели Михајловски.
