Антонио Ташковски – 1Човек и Александар Михајловски – Син на мајка вечерва седнуваат на „Претрес со Ландов“.
СЛЕДЕТЕ ВО ЖИВО:
Двајцата заработуваат од тоа да ги претвораат нашите навики и апсурди во скечеви и стендап и да се шегуваат на туѓа, но и на своја сметка. Вечерва, сепак, тие се на другата страна – прашањата се за нив.
Каде завршува хуморот, а почнува навредата? Може ли сѐ да биде шега? Што е со драмата која ја направија преку видео во кое го споменаа Бојан Велевски? Актери се, инфлуенсери или професионални комичари – и може ли денес воопшто да се живее само од актерство?
Со Антонио Ташковски зборуваме за патот од работите што ги работел пред да стане препознатлив до сцената на МНТ - од доставувач и возач, до љубител на пици. Ќе зборуваме за успехот без познато актерско презиме, парите, љубовта, семејството и за тоа кој е Антонио кога ќе се изгасне камерата и ќе исчезне „1Човек“.
Со Александар Михајловски – за животот со презимето Михајловски, „сенката“ на татко му Тони, односот со родителите, сопственото татковство, но и за периодот од животот во кој јавно проговори за зависностите и за реакциите што следуваа потоа.
Ќе зборуваме и за македонската комичарска сцена, суетата и егото, за тоа кој навистина знае да разбере шега кога ќе биде упатена кон него, но и за публиката која денес со еден коментар може да те крене – или да те распарчи.
И едно едноставно прашање за двајца луѓе кои професионално ги смеат другите:
Што се случува кога никој нема да се насмее на шегата?
Ви откриваат датуми за турнејата!
