Бобан Утковски, во „Претрес со Ландов“, зборува и за воениот конфликт во 2001 година и потпишувањето на Рамковниот договор. Тој тогаш бил во обезбедувањето на претседателот Борис Трајковски.
Жали што во тој период Трајковски и тогашниот премиер Љубчо Георгиевски не успеале да најдат заеднички јазик.
„Не беше во право Георгиевски кога од собраниската говорница се извини што го предложил Трајковски за претседател. Кога го потпишуваа Рамковниот договор, сите лидери како да беа подалеку еден од друг и како да се на сопствениот погреб – сите: Трајковски, Црвенковски, Георгиевски, Џафери и Имери“, вели Утковски.
Сепак, нагласува, секоја војна завршува на маса, а за соработката меѓу МВР и АРМ за време на конфликтот смета дека не била на соодветно ниво.
За функцијата министер за внатрешни работи, која во тој период ја извршуваше Љубе Бошковски, Бобан Утковски вели дека можело да биде одбрано посоодветно решение.
