По речиси еден месец неизвесност, жителите на Гостивар повторно можат безбедно да ја користат водата од водоснабдителниот систем за пиење и подготовка на храна.
Главниот штаб за управување со кризи денеска соопшти дека последните лабораториски резултати потврдиле дека водата е микробиолошки и бактериолошки исправна, со што се исполнети условите за нејзино безбедно користење.
Одлуката следува по денешната седница на Главниот штаб за управување со кризи, на која биле разгледани најновите резултати од анализите на водата.
Директорот на Агенцијата за храна и ветеринарство информираше дека резултатите покажуваат оти водата ги исполнува условите за повторно користење за пиење.
И шефот на Главниот штаб за управување со кризи и директор на Дирекцијата за заштита и спасување, Стојанче Ангелов, на прес-конференција потврди дека водата во Гостивар од денеска е безбедна за пиење.
На граѓаните им е препорачано пред првото користење водата добро да истече од чешмите.
Со последните резултати завршува повеќенеделниот период во кој гостиварци не можеа да ја користат водата од водоводот за пиење поради загадувањето.
