Жителите на Гостивар и натаму не треба да ја користат водата од градскиот водовод за пиење, иако последните лабораториски анализи покажуваат подобрување на нејзиниот квалитет.
Од Локалниот кризен штаб информираат дека забраната останува во сила сè до објавувањето на конечните официјални резултати од надлежните здравствени установи. Во меѓувреме продолжува дистрибуцијата на вода за пиење преку пет пункта во градот.
Со техничка вода се снабдуваат и селата Дебреш и Беловиште, како и населбите Фаснери и Тулана. Обезбедена е вода и за одделението за дијализа во гостиварската болница.
Од Кризниот штаб велат дека се подобруваат нивото на хлор и биолошките параметри во водоводната мрежа, поради што се очекува во наредните денови водата повторно да биде безбедна за пиење.
„Ги очекуваме последните резултати, кои се добри, како во однос на количината на хлор, така и во однос на биолошките резултати. Очекуваме во наредните денови водата да биде за пиење од водоводот Гостивар“, изјави Зуди Џелили од Локалниот кризен штаб.
Дотогаш, граѓаните треба да користат обезбедена вода за пиење и да ја почитуваат забраната за користење на водата од водоводната мрежа за консумирање.
