Волк нападнал осумгодишно девојче во зоолошки парк во Германија, со хеликоптер било пренесено во болница

Осумгодишно девојче се здобило со тешки повреди откако било нападнато од волк во зоолошки парк во Германија, соопштија локалните власти.

— реклама —

Нападот се случил за време на посебна програма за деца во зоолошкиот парк „Јоханисмиле“, јужно од Берлин. Станува збор за однапред резервирана активност во која децата ги придружуваат чуварите и учествуваат во грижата за животните.

— реклама —

Девојчето се наоѓало во оградениот простор со арктички волци кога било нападнато од најмалку едно животно. Поради сериозноста на повредите, со хеликоптер било пренесено во болница.

Во истиот простор имало уште две девојчиња, но чувар на паркот успеал да интервенира пред волците да ги нападнат и нив. Зоолошкиот парк е затворен до понатамошно известување, а во тек е истрага за утврдување на околностите на нападот.

— реклама —

Германската полиција испитува како дошло до инцидентот и дали имало пропусти или небрежност. По настанот, четири лица, меѓу кои и три деца, добиле психолошка помош.

Приватниот парк се наоѓа на околу 45 километри јужно од Берлин и се простира на повеќе од 100 хектари. Во него живеат околу 500 животни, меѓу кои сиви и арктички волци, мечка и рис.