Непознати напаѓачи вчераутро отвориле оган кон американскиот конзулат во центарот на Торонто, по што избегале со автомобил, соопшти канадската полиција. Ова е втор вооружен напад врз истиот објект во текот на оваа година.
Инцидентот се случил околу 4:45 часот по локално време, кога полициски службеник, кој бил распореден во близина на конзулатот како дел од засилените безбедносни мерки, слушнал истрели.
Според заменик-началникот на полицијата, Френк Баредо, веднаш по пукањето бил забележан бел автомобил „Хонда Акорд“ без регистарски таблички како со голема брзина се оддалечува од местото на настанот.
Полицијата накратко го следела возилото по автопатот „Дон Вали“, но потерата била прекината поради безбедносни причини, бидејќи автомобилот се движел со брзина поголема од 140 километри на час.
Истражителите засега не знаат колку лица биле во возилото, ниту кој е мотивот за нападот.
„Кон овој случај ќе пристапиме со најголема сериозност“, изјави Баредо, оценувајќи го нападот како „дрзок“ и „срамен“.
На местото на настанот полицијата пронашла една чаура, а на фасадата на американскиот конзулат биле забележани оштетувања од проектил.
Од Амбасадата на САД соопштија дека во нападот нема повредени и ѝ се заблагодарија на полицијата во Торонто за брзата реакција.
По инцидентот, просторот околу конзулатот бил обезбеден со полициски ленти, а дел од авенијата „Јуниверзити“ бил затворен за сообраќај.
Сличен напад врз истиот конзулат се случи и на 10 март годинава. И тогаш немаше повредени, а канадските власти случајот го квалификуваа како инцидент што ја засега националната безбедност. Подоцна беа уапсени тројца осомничени во рамки на поширока истрага за серија вооружени напади во Торонто, за кои полицијата се сомнева дека биле извршени од млади лица ангажирани и платени за такви кривични дела.
