Возач на приватен автобус на линијата 63 денеска околу 13 часот, на релација од Транспортниот центар кон селото Мралино, ја прекинал рутата и ги оставил патниците на автобуска постојка во Илинден.
Според патниците, додека автобусот се движел кон Мралино, возачот постојано зборувал дека не го знае патот, по што тие почнале да му објаснуваат каде треба да вози и на кои постојки да застане.
Како што тврдат, возачот потоа видливо се изнервирал, го запрел автобусот на постојката „Илинден Први мај“ и им наредил на патниците да се симнат.
Потоа им соопштил дека нема да продолжи до последната постојка во Мралино бидејќи не го знаел патот за назад и не знаел како да се врати во Скопје.
Според возниот ред на ЈСП-Скопје, од постојката „Илинден Први мај“ до крајната станица „Мралино“ има уште 16 автобуски постојки на кои автобусот број 63 треба да застане.
Наместо да ја продолжи рутата, автобусот направил круг на кружниот тек во Илинден и се вратил назад кон Скопје, оставајќи ги патниците на половина пат.
