Јужна Кореја ги освои првите бодови на Светското првенство 2026 откако со голем пресврт ја победи Чешка со 2:1 во натпревар полн со возбудувања и неизвесност до самиот крај во Гвадалахара.
Корејците имаа иницијатива и создадоа повеќе шанси, но долго не успеваа да најдат пат до мрежата. Најмногу се истакна Хеунг-мин Сон, кој пропушти неколку одлични можности, а во 57. минута неговиот удар го запре чешкиот голман Матеј Ковар.
И покрај притисокот на азиската селекција, Чешка прва стигна до водство. Во 59. минута, по долг аут на Владимир Куфал, Ладислав Крејчи најдобро се снајде во шеснаесетникот и со удар со глава погоди за 1:0.
Одговорот на Јужна Кореја следуваше во 67. минута, кога Ин-беом Хванг по асистенција на Канг-ин Ли со прецизен лоб-удар го совлада Ковар и израмни на 1:1.
Решавачки се покажа потегот на корејскиот селектор, кој го внесе Хјеон-гју Ох на местото на Сон. Откако на Чешка ѝ беше поништен погодок на Томаш Соучек поради офсајд, Ох во 80. минута ја искористи асистенцијата од Хванг и ја донесе победата од 2:1.
Во финишот Чесите имаа можност да избегнат пораз, но голманот Ким Сеунг-гју со извонредна интервенција ја сочува предноста и им ги обезбеди трите бода на Корејците.
Претходно, домаќинот Мексико со 2:0 ја совлада Јужна Африка во воведниот натпревар од Групата А. Кињонес и Хименез беа стрелци за Мексиканците, а средбата ја одбележаа и три исклучувања.
