Ноќните натпревари на Светското првенство донесоа многу возбуда, а љубителите на фудбалот беа сведоци на драматично реми и историски триумф во рамките на второто коло од групите Г и Х.
Во Мајами, Уругвај и Зелено’ртските Острови одиграа нерешено 2:2 во натпревар од второто коло во Групата Х. Најмалата земја учесник на овој Мундијал прва дојде до предност преку Кевин Ленини, кој погоди од слободен удар во 21. минута.
Уругвајците успеаја да направат пресврт до крајот на првото полувреме со головите на Максимилијано Араухо и Агустин Каноби, но селекцијата на Зелено’ртските Острови не се предаде. Во второто полувреме, Хелио Варела постигна гол за конечни 2:2 и голем бод за својата репрезентација.
Во последниот натпревар од второто коло во Групата Г, Египет ја совлада селекцијата на Нов Зеланд со 3:1 и стигна до историска, прва победа на Светските првенства.
По негатива во првиот дел, Египќаните направија целосен пресврт во второто полувреме благодарение на головите на Зико, Мохамед Салах и Махмуд Трезеге.
Со оваа победа, Египет се искачи на првото место во групата со четири бодови, пред Иран и Белгија, додека Нов Зеланд остана на последната позиција.
По две одиграни кола, борбата за пласман во нокаут-фазата останува целосно отворена во двете групи.
