Во текот на изминатото деноноќие, полициски службеници на различни локации низ државата лишиле од слобода 10 лица кои управувале возило без да имаат положено возачки испит.
Од МВР информираат дека лицата се приведени поради сомнение за сторено кривично дело „безобѕирно управување возило“ согласно член 297-а од Кривичниот законик.
Меѓу приведените се четворица жители на Скопје, двајца жители на Студеничани, како и лица од Петровец, Батинци, Тетово и Неготино. Еден од приведените, 34-годишниот М.Ј. од Неготино, воедно бил и под дејство на алкохол.
Од МВР најавуваат дека по целосното документирање на случаите ќе бидат поднесени соодветни кривични пријави.
Од полицијата апелираат до сите учесници во сообраќајот да ги почитуваат правилата и прописите и да не управуваат возило без положен возачки испит, со изречена забрана за управување или под дејство на алкохол.
