Возеле пијани, без дозвола и покрај забрана – десет возачи приведени за едно деноноќие: еден имал речиси два промили алкохол

Десет возачи биле лишени од слобода во текот на изминатото деноноќие на различни локации низ државата поради безобѕирно управување со моторно возило, соопшти Министерството за внатрешни работи.

— реклама —

Четворица од нив управувале возило без положен возачки испит. Станува збор за Т.Т. (43) од Битола, О.И. (44) од Кичево, малолетник од Скопје и М.С. (35) од кавадаречкото село Ваташа, кој управувал трактор.

Двајца возачи биле фатени зад воланот под дејство на алкохол. Кај Д.Б. (21) од Скопје биле измерени 1,99 промили алкохол во крвта, додека кај Ј.Г. (67) од Штип имало 1,77 промили.

— реклама —

Уште тројца возачи управувале возило и покрај активната забрана за управување. Тоа се З.С. (55) и И.С. (54) од Кичево, како и С.М. (58) од делчевското село Илиово.

— реклама —

Меѓу приведените има и малолетник од Неготино, кој управувал мотоцикл без возачка дозвола, а возилото било и нерегистрирано.

Од МВР информираат дека по целосно документирање на случаите ќе бидат поднесени соодветни кривични пријави.

Министерството апелира до сите учесници во сообраќајот да ги почитуваат правилата и прописите, да не управуваат возило без положен возачки испит, со активна забрана или под дејство на алкохол, со цел зголемување на безбедноста на патиштата.