Врховниот суд пресуди дека бизнисменот Јордан Камчев нема право да бара надомест од 1,5 милиони евра во граѓанската постапка поврзана со случајот „Рекет“, оценувајќи дека не може да се смета за оштетен.
Како што објави Призма.мк, петчлен судечки совет утврдил дека Камчев нема основ да ги побарува средствата што ги дал, иако преку својот адвокат Александар Михајловски поднел барање за ревизија на претходните одлуки со кои му била одбиена тужбата.
Камчев во 2022 година ги тужеше Катица Јанева, Бојан Јовановски и Зоран Милевски, како и поранешното Специјално јавно обвинителство, барајќи враќање на парите што, според неговите тврдења, биле дадени како рекет. Подоцна се откажа од тужбата против Милевски.
Во образложението, Врховниот суд наведува дека тужителот се впуштил во „морално недопуштено договарање“ со тужените, со цел да ја олесни својата положба во предметот „Империја“, поради што нема право на обештетување.
„Кога двете страни се несовесни, ниту една од нив не може да го поврати даденото“, се наведува во пресудата.
Судот оценил дека со давањето пари Камчев сторил кривично дело „давање награда за противзаконито влијание“, додавајќи дека евентуалното обештетување би значело нарушување на интегритетот на правосудниот систем.
„Дозволувањето тужителот да биде обештетен би значело компромитирање на интегритетот на правосудниот систем во неговата срж“, стои во одлуката.
Дополнително, судот утврдил дека дел од тужбеното барање, кое се однесува на околу 500 илјади евра дадени на Јовановски, не е поткрепено со материјални докази, како и дека Камчев не бил непосреден сведок за наводната исплата кон Јанева.
Со пресудата, Камчев е задолжен да ѝ исплати на Јанева 52 илјади денари за трошоци за одговор на ревизијата.
Случајот „Рекет“ претходно заврши со правосилна пресуда, со која Бојан Јовановски беше осуден на девет години затвор за „примање награда за противзаконито влијание“ и „перење пари“, додека Катица Јанева доби седумгодишна затворска казна за „злоупотреба на службената положба и овластување“.
