(Видео) Вучиќ по упадот во „Информер“: „ЕУ молчи, новинарските здруженија молчат – ние да го направевме ова, ќе бевме диктатори“

Александар Вучиќ остро реагираше по упадот во редакцијата на српската телевизија „Информер“, оценувајќи дека станува збор за напад врз слободата на новинарството. Тој ги обвини Европската Унија и новинарските здруженија дека молчат за случувањата, а најави дека неговите политички соработници нема да се повлечат пред, како што рече, притисоците и заканите.

„Сведочевме на напад без преседан, напад врз слободата на новинарството. Интересно е што сите молчат за тоа. ЕУ молчи. Молчат и новинарските здруженија. Ние да го правевме тоа, ќе бевме диктатори и којзнае што“, изјави Вучиќ.

Тој се осврна и на реакцијата на главниот уредник на „Информер“, кој, според неговите зборови, јавно го повикал носителот на Студентската листа да се изјасни дали ќе ги повика луѓето да излезат.

— реклама —

Вучиќ порача дека нема да дозволат заплашување и дека ќе се спротивстават на секој обид за загрозување на физичкиот и личниот интегритет.

— реклама —

„Не им се плашиме и ќе се спротивставиме. Ќе го сочуваме физичкиот и личниот интегритет“, рече тој.

Според Вучиќ, случувањата во редакцијата покажале каква атмосфера може да се создаде по политичките промени во Србија. Тој ги обвини учесниците во инцидентот дека наместо да преземат одговорност, прибегнуваат кон малтретирање.

„Потребен беше само еден ден за ова. Тие не знаат што ќе прават, освен ако можат некого да малтретираат. Одговорност? Нема никаде“, изјави Вучиќ.

Тој им се заблагодари на полицајците за кои оцени дека се обиделе професионално да ја извршат својата должност за време на инцидентот.

— реклама —

„Им благодарам на неколкуте чесни полицајци кои сакаа професионално да си ја завршат работата“, рече Вучиќ.

Во завршниот дел од обраќањето, тој најави продолжување на политичката борба и покрај изборниот пораз на неговата коалиција.

„Ние да се подготвиме за тажна и тешка борба, од која ќе излеземе како победници“, порача Вучиќ.

Неговата реакција следува по случувањата во „Информер“ за време на изборната ноќ во Србија. Тврдењата за молчењето на меѓународните институции, одговорноста за инцидентот и мотивите на учесниците се оценки изнесени од Вучиќ.