Претседателот на СДСМ, Венко Филипче, на денешната прес-конференција оцени дека вчерашните случувања во Собранието биле политички театар чија цел, според него, била да се прикријат неуспесите на Владата и недостатокот на резултати.
Според Филипче, премиерот Христијан Мицкоски со, како што рече, создавање хаос во законодавниот дом се обидува да обезбеди алиби за евентуални предвремени парламентарни избори.
„Вчера направи хаос за да ја прикрие сопствената неспособност и тоа што Владата нема резултати во ниту еден сегмент. Сега очајно му треба алиби за предвремени избори“, изјави Филипче.
Тој додаде дека наместо да понуди решенија за економските проблеми, растот на цените и падот на животниот стандард, Мицкоски, според него, избирал навреди и закани кон опозициските пратеници.
Осврнувајќи се на извинувањето на премиерот, Филипче рече дека станува збор за „изнуено и срамно извинување“, оценувајќи дека тоа било политички театар без вистинско преземање одговорност.
„Вистинското извинување подразбира признавање на грешката, промена на однесувањето и санкции за сите што учествувале во навредите. Граѓаните заслужуваат почит и достоинство, а не поделби и навреди“, истакна Филипче.
Тој порача дека заканите и навредите не се израз на сила, туку на слабост и неспособност, додавајќи дека, според него, „никој не му се плаши на Христијан Мицкоски“.
