Холандија ја потврди фаворитската улога и со триумф од 3-1 над Тунис го освои првото место во својата група на Светското првенство. Во исто време, ремито од 1-1 меѓу Јапонија и Шведска им донесе пласман во следната рунда на двете селекции.
Холандската репрезентација уште од стартот го наметна својот ритам. Само по три минути игра, Тунис се најде во негатива по автоголот на Шири, а Броби четири минути подоцна ја зголеми предноста на 2-0.
Тунижаните успеаја да внесат неизвесност во натпреварот кога Мастури во 54. минута ја затресе мрежата за 2-1, но нивниот отпор беше скршен осум минути подоцна. Ван Хеке погоди за 3-1 и ги постави конечните бројки на семафорот. За Тунис ова беше и трет пораз на шампионатот, па настапот го заврши без освоен бод.
На вториот натпревар во групата, Јапонија и Шведска одиграа нерешено. Маеда им донесе водство на Јапонците во 56. минута, но Еланга брзо возврати и во 62. минута израмни на 1-1.
Со овој резултат, Јапонија успеа по вторпат во својата историја да ја мине групната фаза на Светско првенство без пораз, повторувајќи го успехот што го оствари како еден од домаќините на Мундијалот.
По завршувањето на групната фаза, Холандија е прва со седум бодови, Јапонија втора со пет, додека Шведска со четири бодови обезбеди место во осминафиналето како една од најуспешните третопласирани репрезентации. Тунис остана на дното на табелата без бодовно салдо.
