По вистинска драма во Монтереј, фудбалерите на Мароко обезбедија пласман во осминафиналето на Светското првенство, откако по подобро изведување пенали ја совладаа Холандија со 3:2. По 120 минути игра резултатот беше 1:1.
Мароко ќе игра против Канада во следната рунда, а натпреварот е закажан за 4 јули од 19 часот по македонско време.
Првото полувреме донесе цврста и израмнета игра со мал број шанси, но Мароканците беа поконкретни. Холандскиот голман Барт Вербруген во 20. минута имаше две одлични интервенции, најпрво по ударот со глава на Ајуб Буади, а потоа и по силниот шут на Ашраф Хакими од далечина.
И Холандија се закани пред паузата, но Боно успешно реагираше по ударот на Мики ван де Вен. Во судиското продолжение од првиот дел, Исмаел Саибари задоцни за само неколку сантиметри по центаршутот на Хакими.
Мароко доминираше и во второто полувреме. Во 52. минута Хакими ја погоди пречката по одлична акција со Азедин Оунахи. Сепак, и покрај иницијативата на Мароканците, Холандија поведе во 72. минута. Ваут Вегорст со глава ја спушти топката до Крисенси Самервил, кој му асистираше на Коди Гакпо, а напаѓачот прецизно погоди за 1:0.
Гакпо погодокот го прослави емотивно, откако само два дена претходно тој и неговата партнерка соопштија дека го загубиле своето неродено дете.
Кога се чинеше дека Холандија ќе ја сочува предноста, Мароко израмни во првата минута од судиското продолжение. Усам Талби нафрли од левата страна, а Иса Диоп беше највисок во скокот и со удар со глава ја испрати топката во мрежата за 1:1.
Во продолженијата Мароко повторно беше поопасен. Во 96. минута Саибари излезе сам пред Вербруген, но холандскиот чувар на мрежата повторно одлично интервенираше.
Победникот беше решен по пенал-рулетот. Купмајнерс беше прецизен за Холандија, додека Нил Ел Ајнауи ја погоди гредата. Клајверт потоа ја погоди стативата, а Рахими израмни на 1:1. Вегорст и Талби беа сигурни во третата серија, а во четвртата и Тимбер и Хакими не реализираа. Решавачкиот момент се случи во петтата серија, кога Боно го одбрани ударот на Самервил, по што Исмаел Саибари погоди за конечни 3:2 и големо славје на Мароко.
Ова беше еден од најатрактивните натпревари во оваа фаза од турнирот, бидејќи се сретнаа две селекции кои се наоѓаат меѓу десетте најдобри на ФИФА ранг-листата. Холандија, иако ја продолжи серијата без пораз во регуларниот дел на Светските првенства, повторно беше елиминирана по изведување пенали.
