Доктор Милан Ристески предупредува дека загадувањето на водата со фекалии може да предизвика не само акутни здравствени проблеми, туку и сериозни долгорочни последици, повикувајќи на поголемо внимание кон здравствената состојба на граѓаните погодени од случајот со водата во Гостивар.
Во објава на социјалните мрежи, Ристески наведува дека консумирањето вода загадена со фекалии може да предизвика нарушување на цревниот микробиом, односно дисбиоза, поради дејството на патогени микроорганизми како Escherichia coli (E. coli), Salmonella и Giardia.
Според него, ваквата состојба потенцијално може да доведе до хронични воспаленија и нарушена функција на цревата, долготрајни дигестивни проблеми, како синдром на иритабилно дебело црево и хронична дијареа, како и до колонизација со бактерии отпорни на антибиотици.
Ристески посочува дека можни се и нарушувања на имунолошкиот систем, зголемен ризик од одредени автоимуни и метаболички заболувања, како и влијание врз менталното здравје преку поврзаноста меѓу цревниот микробиом и мозокот.
Тој прашува дали институциите се свесни за потенцијалните долгорочни здравствени последици за жителите на Гостивар и каков би можел да биде финансискиот товар од евентуалното лекување.
