Германската полиција уапси 60-годишен хрватски државјанин под сомнение дека ја убил својата 58-годишна сопруга на улица во градот Келкхајм, во сојузната покраина Хесен. Злосторството се случило пред очите на бројни минувачи, кои успеале да го совладаат и да го задржат осомничениот до пристигнувањето на полицијата.
Според германските медиуми, трагедијата се случила во близина на градскиот пазар, а наводно ѝ претходела расправија меѓу сопружниците, кои биле во брак од 1991 година. Обвинителството во Франкфурт потврди дека станува збор за хрватски државјани, но засега не соопштува дополнителни детали поради тековната истрага.
Истражен судија треба да одлучи дали на осомничениот ќе му биде одреден притвор.
Еден очевидец, кој се претставил како Петар, изјавил дека се наоѓал на само неколку метри од местото на нападот. Според неговото сведочење, напаѓачот, за кој претпоставува дека можеби бил под дејство на алкохол, со мачета ја нападнал сопругата во пределот на вратот.
„Имаше крв насекаде. Побегнав за да си го спасам животот“, изјавил сведокот, додавајќи дека видел само еден удар, по кој нападот завршил.
Пријател на семејството изјавил дека осомничениот долго време го познавал како агресивен човек, кој често ѝ се заканувал на сопругата. Според него, жртвата во последните месеци изгледала исцрпено и под голем стрес.
На местото на трагедијата граѓани оставаа цвеќе во знак на почит кон жртвата. Една жена изјавила дека секојдневно престојувала во тој дел од градот и дека била шокирана од случувањето.
Полицијата засега официјално соопштува само дека било употребено ладно оружје, без да потврди дека станува збор за мачета. Жената починала на местото на нападот, а форензичките екипи со часови вршеле увид.
Истражителите сè уште го утврдуваат мотивот за злосторството. Во јавноста се отвори и прашањето дали случајот ќе биде квалификуван како фемицид, со оглед на тоа што осомничениот е сопруг на жртвата.
Весникот „Билд“, повикувајќи се на свои извори, објави дека сопружниците и претходно често се расправале и дека жената повеќепати барала интервенција од полицијата. Овие информации засега не се официјално потврдени од надлежните органи.
