Хрватска и Казахстан ја унапредуваат соработката во областа на нафтата и гасот, по разговорите меѓу претставници на казахстанската компанија „KazMunajGas“ и Агенцијата за јаглеводороди (АЗУ) за напредокот на проектот за истражување „Шигис“, соопшти АЗУ.
Станува збор за заеднички истражувачки проект кој го развиваат „KazMunajGas“ и компанијата „Геоенергија развој“, подружница на Агенцијата за јаглеводороди.
На состанокот во Астана, извршниот директор на „KazMunajGas“, Ашат Хасенов, и директорот на Агенцијата за јаглеводороди, Маријан Крпан, го разгледале напредокот во реализацијата на проектот.
Договорот за користење на подземните ресурси за истражувачкиот блок „Шигис“ е потпишан годинава меѓу Министерството за енергетика на Казахстан, „KazMunajGas“ и „Геоенергија развој“.
Проектот се реализира врз основа на партнерство 50:50, при што хрватската страна ја финансира фазата на истражување. Минималната програма опфаќа 500 километри 2Д сеизмички податоци и бушење истражна бушотина до длабочина од 3.500 метри.
Според АЗУ, ова е прва инвестиција на хрватска компанија во секторот за истражување на јаглеводороди во Казахстан, што претставува значаен чекор во зајакнувањето на економската соработка меѓу двете земји. Воедно се наведува дека во тек е формирање на оперативна компанија за реализација на проектот.
