Минималната победа на Хрватска од 1:0 против Панама во второто коло од групата Л на Светското првенство беше во фокусот и на шпанските медиуми, кои оценија дека избраниците на Златко Далиќ повторно не прикажале убедлива игра.
Иако со триумфот останаа во трката за пласман во следната фаза, Хрватите повторно се соочија со сериозни проблеми на теренот. Херој на натпреварот беше Анте Будимир, кој го постигна единствениот погодок и ѝ донесе значајни три бода на својата репрезентација.
Шпанскиот весник „Ас“ пишува дека Хрватска уште еднаш покажала дека знае да се справува со тешки ситуации и да преживее во клучните моменти.
„Хрватска сè уште е жива на Светското првенство. Будимир се појави и ја реши Панама. Балканците уште еднаш покажаа колку се издржливи и отпорни, а овојпат беа наградени со голот на Анте Будимир“, наведува шпанскиот медиум.
Во анализата, „Ас“ оценува дека хрватската игра била прилично конфузна, особено во дефанзивната линија, каде што Панама неколкупати сериозно се заканила.
Посебно внимание шпанскиот медиум му посветува на Лука Модриќ, кој го одигра својот 200. натпревар во националниот дрес и беше испратен со овации од трибините.
Сепак, според „Ас“, искусниот играч повторно имал потешкотии да ја преземе контролата врз играта.
„Лука Модриќ, слично како и на првиот натпревар, тешко ја контролираше играта. Не успеваше да го води тимот и да ги координира дефанзивните задачи, во кои Матео Ковачиќ беше многу поактивен“, пишува шпанскиот весник.
Во текстот се додава дека талентот на Мартин Батурина доаѓал до израз само во одредени моменти од натпреварот.
