За два дена двапати фатен „мртов пијан“ зад волан: Битолчанец возел со 3,23, па со 3,50 промили алкохол

Двапати за само два дена, 29-годишен битолчанец бил уапсен бидејќи управувал автомобил со повеќе од три промили алкохол во крвта. И покрај првото лишување од слобода, повторно седнал зад волан, овојпат со уште повисоко ниво на алкохол.

Станува збор за Х.Ј. (29) од Битола, кој на 7 ноември, во 21:30 часот, бил запрен од полициски службеници на паркингот кај спортската сала „Боро Чурлевски“.

— реклама —

При контролата било утврдено дека управувал „мерцедес“ со битолски регистарски ознаки со 3,23 промили алкохол во крвта, по што бил лишен од слобода.

Но, неполни два дена подоцна, на 9 ноември, во 02:41 часот, истиот возач повторно бил запрен од полицијата, овојпат на улицата „Партизанска“ во Битола.

— реклама —

И повторно управувал „мерцедес“ под дејство на алкохол. При втората контрола му биле измерени дури 3,50 промили алкохол во крвта.

— реклама —

Од СВР Битола за „Скопје1“ потврдуваат дека станува збор за истото лице, кое било лишено од слобода во два одделни случаи за управување возило под силно дејство на алкохол.

Според информациите доставени од полицијата, на 29-годишникот му е одреден притвор во траење од осум дена.

— реклама —

За двата настани полицијата најави соодветни поднесоци по целосното документирање.

Случајот отвора сериозно прашање за безбедноста во сообраќајот, особено затоа што возачот повторно седнал зад волан по претходното полициско постапување, со уште поголема концентрација на алкохол во крвта.