За пет дена пријавени 25 случаи на семејно насилство, приведени 14 лица

Дваесет и пет пријави за семејно насилство и насилство во партнерски и семејни односи биле регистрирани во Македонија во периодот од 1 до 5 ноември 2026 година, соопшти Министерството за внатрешни работи. Во рамките на постапувањето, полицијата лишила од слобода и привела 14 лица.

— реклама —

Случаите биле пријавени на подрачјата на Скопје, Куманово, Кочани, Штип, Велес, Охрид, Гостивар, Кавадарци, Прилеп, Битола, Тетово, Берово, Струга, Кичево, Свети Николе и Струмица.

— реклама —

Пријавите опфаќаат физички напади врз сопружници, поранешни партнери, родители, деца и други членови на семејството, но и психичко малтретирање, закани и вознемирување. Евидентирани се и случаи на непочитување на судски заштитни мерки и решенија на центрите за социјална работа поврзани со видувањата со малолетни деца.

Меѓу пријавените настани, во Скопје лице со остар предмет ѝ се заканувало на својата мајка, додека во Тетово поранешен партнер следел и ѝ упатувал закани на жена, непочитувајќи ги изречените судски мерки. Пријавени биле и случаи на физичко насилство врз малолетници.

— реклама —

Од МВР информираат дека по целосното документирање на настаните ќе бидат поднесени соодветни пријави и поднесоци против инволвираните лица.

— реклама —

Министерството апелира до граѓаните да пријавуваат каква било форма на семејно насилство и да не молчат, за надлежните институции да можат навремено да реагираат.