За првпат целосно дигитални учебници во Македонија – „Арс Ламина“ ги обезбедува бесплатно за сите ученици и наставници

Учениците од деветто одделение од оваа учебна година за првпат во Македонија добиваат пристап до целосно дигитални учебници со интерактивни и мултимедијални содржини, како и систем за следење на напредокот во учењето.

Дигиталните учебници по математика и хемија, развиени од издавачката куќа „Арс Ламина“, се достапни бесплатно за сите ученици, наставници и родители преку образовната платформа ucebnici.mk.

Од „Арс Ламина“ објаснуваат дека овие изданија се разликуваат од класичните електронски учебници, кои најчесто претставуваат дигитална верзија на печатеното издание во PDF-формат, со дополнителни линкови или поединечни интерактивни содржини.

— реклама —

Целосно дигиталните учебници се креирани за користење во дигитална средина. Покрај основната наставна содржина, лекциите содржат филмови, анимации, видеа, галерии со фотографии, задачи, интерактивни активности, симулации и други образовни материјали.

Содржините се интегрирани директно во лекциите, овозможувајќи ученикот непречено да се движи низ текстот, визуелните материјали, видеата и интерактивните задачи, без постојано да отвора дополнителни надворешни содржини.

Дополнителна можност е интегрираниот Learning Management System (LMS), преку кој наставниците можат да го следат напредокот на учениците. Тие имаат увид во работата на учениците од своето училиште и можат да препознаат во кои области е потребна дополнителна поддршка.

Учениците можат да учат со свое темпо, да се навраќаат на одредени лекции и да го следат сопствениот напредок, додека родителите добиваат поголем увид во процесот на учење.

— реклама —

Дигиталните лекции се приспособени за различни уреди и можат да се користат преку компјутер, таблет или мобилен телефон, без да се нарушат нивната структура и функционалност.

„Нашата цел не беше едноставно печатениот учебник да го претвориме во PDF-формат и да му додадеме неколку видеа или линкови. Сакавме да создадеме вистински дигитален учебник – средина во која содржината, мултимедијата, интерактивните задачи и системот за следење на учењето функционираат како една целина“, изјави Дарко Фиданоски, основач и косопственик на „Арс Ламина“.

Тој посочи дека проектот е продолжение на определбата на издавачката куќа да вложува во современи образовни решенија и да им обезбеди поддршка не само на учениците, туку и на наставниците.

— реклама —

Фиданоски нагласи дека зад платформата стои, како што наведува, прв целосно домашно развиен LMS-систем, изработен од тимот на „Арс Ламина“ и континуирано надградуван.

Платформата ucebnici.mk функционирала во тест-фаза и во текот на минатата учебна година, кога содржините за осмо и деветто одделение биле достапни за ограничено користење. Искуствата и повратните информации од учениците и наставниците биле искористени за дополнително унапредување на системот.

Од почетокот на учебната 2026/2027 година платформата официјално е достапна за сите корисници, а дигиталните учебници по математика и хемија за деветто одделение можат да се користат бесплатно.

Во дигиталните изданија се вклучени и видеосодржини, дел од нив лиценцирани од образовната платформа SciVi. Станува збор за видеа со експерименти поврзани со наставната програма по хемија, физика и биологија за седмо, осмо и деветто одделение.

— реклама —

На овој начин учениците можат визуелно да следат процеси и експерименти што тешко се објаснуваат само со текст и илустрации, особено во ситуации кога во училиштата нема услови за нивно практично изведување.

Од „Арс Ламина“ велат дека со целосно дигиталните учебници и отворената платформа прават чекор кон посовремено и подостапно образование, во кое дигиталната технологија е интегрирана директно во процесот на учење.

Дигиталните учебници по математика и хемија за деветто одделение се достапни бесплатно преку ucebnici.mk и scivi.com.