Сообраќајната полиција во период од една недела открила 1.576 прекршоци за пречекорување на дозволената брзина во рамки на паневропската акција ROADPOL Operation Speed.
Засилените контроли биле спроведени од 3 до 9 август 2026 година на територијата на целата држава, со цел откривање и санкционирање на возачи кои ја надминувале дозволената брзина.
Полициските службеници континуирано ја мереле брзината на возилата, со посебен фокус на патните правци и локациите каде што, според сообраќајно-безбедносните анализи, постои поголем ризик од сообраќајни незгоди поради несоодветна или неприлагодена брзина.
Вкупно биле регистрирани 1.576 прекршоци поврзани со пречекорување на дозволената брзина.
Акцијата е дел од ROADPOL Operation Speed, координирана активност во која учествуваат сообраќајните полициски служби од земјите членки на ROADPOL.
Од МВР посочуваат дека ваквите активности се насочени кон превенција на сообраќајните незгоди, зголемување на дисциплината во сообраќајот и намалување на бројот и последиците од незгодите на патиштата.
