За суштинските внатрешни промени недостасува политичка волја, сметаат од иницијативата „Разговори за иднината во 12:05“

Борбата против корупцијата, реформите на политичкиот систем и промените во изборното законодавство не смеат да се одложуваат до членството во Европската Унија, порачуваат од иницијативата „Разговори за иднината во 12:05“, во реакцијата на извештајот на Европската комисија за напредокот на Македонија за 2026 година.

— реклама —

Од иницијативата оценуваат дека европската иднина на земјата е стратешко државно прашање и не смее да биде предмет на дневнополитички пресметки или партиски интереси. Според нив, ниту една политичка партија нема ексклузивно право да ги претставува евроинтеграциите или патриотизмот.

Тие изразуваат загриженост за забелешките на Европската комисија во врска со високата политичка корупција, измените на Кривичниот законик од 2023 година, слободата на медиумите и економските состојби. Особено го издвојуваат падот на повратот на ДДВ кон стопанството, наведувајќи дека од секои 100 денари собран ДДВ, во законскиот рок се враќаат само 14,3 денари.

— реклама —

Иницијативата ги поздравува поддршката на граѓаните за членството во ЕУ, резултатите на Македонија во рамките на Планот за раст за Западен Балкан, спроведувањето на Реформската агенда и целосната усогласеност со заедничката надворешна и безбедносна политика на Унијата. Сепак, сметаат дека за суштинските внатрешни промени недостасува политичка волја.

— реклама —

Меѓу барањата се итно усвојување национален план за повторно приклучување на Македонија во групата земји со Албанија и Црна Гора, постигнување политички и мултиетнички консензус за неопходните уставни измени, воведување една изборна единица и отворени листи, како и законски решенија за спречување на застарувањето на кривичниот прогон за политичка корупција.

Од иницијативата бараат и испитување на потеклото на движниот и недвижниот имот на сегашните и поранешните избрани и именувани функционери, како и на членовите на нивните потесни семејства.

— реклама —

„За промени внатре не треба да чекаме“, порачуваат организаторите.