Полициските службеници во изминатите три дена регистрирале 1.621 сообраќаен прекршок на патиштата низ државата, а 43 лица биле лишени од слобода поради безобѕирно управување со возило, соопшти Министерството за внатрешни работи.
Контролите биле спроведени на 24, 25 и 26 август од страна на полициските службеници од сите сектори за внатрешни работи. Од вкупниот број издадени платни налози, 456 се однесуваат на возачи кои ја надминале дозволената брзина.
Од 43-те лица лишени од слобода поради безобѕирно управување со возило, двајца биле фатени како управуваат под дејство на алкохол, 20 возеле без возачка дозвола, а двајца управувале возило и покрај претходно изречена забрана.
Во истиот период биле одземени и 19 возила согласно член 300-б од Кривичниот законик.
Статистиката од спроведените полициски контроли покажува дека биле регистрирани и 385 прекршоци за неправилно паркирање, додека 28 возачи биле санкционирани поради управување возило под дејство на алкохол.
Поради неносење заштитен шлем биле санкционирани 159 возачи на мотоцикли. Казни добиле и 105 учесници во сообраќајот кои не користеле сигурносен појас.
Согласно Законот за возила, од сообраќај биле отстранети 17 нерегистрирани возила, додека седум возила биле исклучени поради техничка неисправност.
Полицијата санкционирала и четворица возачи поради непочитување на пропишаните услови за затемнување на стаклата на возилата со фолии.
Од МВР информираат дека сообраќајните контроли продолжуваат и во наредните денови. Од Министерството апелираат до сите учесници во сообраќајот да ги почитуваат правилата и прописите и со одговорно однесување да придонесат за поголема безбедност на патиштата.
