„Заеднички омилен пејач им е Харис Џиновиќ“ – ВМРО-ДПМНЕ ги прозва Филипче, Заев и Вучиќ

ВМРО-ДПМНЕ со остри обвинувања кон лидерот на СДСМ, Венко Филипче, и поранешниот премиер Зоран Заев, тврдејќи дека нивните политички и лични врски со Александар Вучиќ се во спротивност со денешните критики што Филипче ги упатува кон него.

Во партиското соопштение, ВМРО-ДПМНЕ ги поврзува изборните порази на СДСМ и на политичката опција предводена од Вучиќ во Србија, оценувајќи дека станува збор за политичари кои во минатото имале блиски односи.

— реклама —

„Падот почна од СДС, Венко Филипче и Зоран Заев, па продолжи со Вучиќ. Венко Филипче не може да избега од сопственото политичко минато и тоа нема да успее да го направи ни со 1000 прес-конференции“, се наведува во соопштението.

Од владејачката партија тврдат дека Филипче денес се обидува да се претстави како критичар на Вучиќ, иако во минатото, заедно со Заев, одржувал блиски политички односи со него.

— реклама —

ВМРО-ДПМНЕ во својата реакција го споменува и пејачот Харис Џиновиќ, посочувајќи дека постојат видеоснимки од приватни забави на кои Заев и Филипче се веселат во Дубаи додека тој пее. Според партијата, постојат и снимки од забави на кои присуствувала Ана Брнабиќ со други српски функционери, како и видео на кое Вучиќ ги слуша песните на истиот пејач.

„Филипче, Заев, Вучиќ и соработниците имаат и заеднички омилен пејач, кој им пее на приватни журки“, тврдат од ВМРО-ДПМНЕ.

Партијата ги обвинува Заев и Филипче и за кадровски поврзаности со луѓе блиски до Вучиќ. Во соопштението се тврди дека за директор на ЕСМ бил поставен човек поврзан со српскиот политичар, додека за односи со јавноста во СДСМ бил ангажиран Башановиќ, кого ВМРО-ДПМНЕ го претставува како кум на Вучиќ.

— реклама —

Во истата реакција се изнесуваат и обвинувања поврзани со марихуаната и нејзиното наводно пренесување од Македонија во Србија за време на владеењето на СДСМ, без да се приложат конкретни докази за поврзаност на споменатите политичари со такви дејствија.

„Нивната поврзаност е уште поголема и таа допрва ќе се открива“, порачуваат од ВМРО-ДПМНЕ.

Партијата заклучува дека Филипче и Вучиќ политички не се разликуваат, а како аргумент ги наведува изборните резултати на СДСМ во Македонија и поразот на политичката опција на Вучиќ во Србија.

Во соопштението не се приложени докази за сите изнесени обвинувања, ниту е наведено дали за нив се водат постапки пред надлежните институции.