Премиерот Зоран Заев денеска се сретна со министерот за надворешни работи на Република Грција во рамки на неговата официјална посета на државава.
На билатералната средба се разговараше за поддршката која Република Северна Македонија континуирано ја добива од Република Грција на патот на евроатланските интеграции и за развојот на трговската размена и инвестициите помеѓу двете држави.
Грција е трет најголем инвеститор во Северна Македонија, а претендира во следниот период да дојде на првото место. Преспанскиот договор е извонредна можност за зајакнување на културните и економските врски помеѓу двете држави.
Министерот за надворешни Никос Дендиас рече дека без разлика кој е на власт во Грција, секоја влада принципиелно се залага за имплементирање на заклучоците од Солунскиот самит со кој се поддржува интеграцијата на балканските земји во Европската унија. Дендиас додаде дека по барање на премиерот Мицотакис во следниот период ќе ја интензивира својата лоби агенда во европските центри на моќ, во кој ќе бара начин како Северна Македонија што е можно побрзо да го почне процесот на преговори со Европската Унија.
Премиерот Заев се заблагодари за севкупната поддршка која ја добиваме од владата во Атина и се осврна на потребата на зголемување на економската размена, но и подобрување и отворање на нови инфраструктурни канали кои треба да ја поддржат бизнис заедницата. Премиерот Заев подвлече дека кога бизнисот се развива, граѓаните во нашите две држави ќе имаат и подобар животен стандард.
