Северна Македонија треба да се сконцентрира на економските реформи за да го забрза процесот на интегрирање во ЕУ и да ги стабилизира јавните финансии, бидејќи политичките изглед се подобрени, објави Светската банка вчера.
Во извештајот на Банката, насловен „Најнови економски прогнози за Европа и Централа Азија“, се посочува дека земјите во овој регион бележат различни стапки на раст на националните економии.
Годинава економскиот раст во Европа и во Централна Азија ќе забави на 2,1 проценти, како последица на глобалното забавување на економијата и неизвесните перспективи, предвидува Светската банка.
Како земји во кои годинава се очекува најголем економски раст во регионот се посочени Албанија и Србија, а најмал раст од само еден отсто се предвидува за Турција, која во 2017 година имаше раст од 7,4 проценти.
Премиерот Зоран Заев пак очекува економски раст од над четири проценти во првиот квартал годинава и надминување на проекциите за раст од 3,2 проценти за целата година.
– Во полн интензитет е и гасификацијата, железницата е целосно ослободена, тоа се 75 проценти од капиталните инвестици во државата, а останатите 25 проценти ги придвижуваме во деловите за канализации, градинки и училишта. Само со засукани ракави и добра работа можеме да ги пробиеме дури и проектираните параметри, рече Заев.