Родителите на убиените момчиња во случајот „Монструм“ денеска го слушнаа сведочењето на претседателот на СДСМ Зоран Заев.
Сè што поседував како аудио снимки, СМС пораки, транскрипти и други докази за „Монструм“ при крајот на 2015 година ги предадов во СЈО, рече денеска во судница претседателот на СДСМ, Зоран Заев.
–Според евиденцијата, имаше повеќе од 1 милион бомби. Дел имам преслушано и споделено со јавноста, но тоа е само мал дел, рече Заев одговарајќи на прашање на судијата Ставрев.
На прашањето на обвинителката Фатиме Фетаи, кој ја правеше селекцијата, Заев рече:
-Разговорите, лично ги разгледував. За конкретниот случај, видов разговори во форма на транскрипти, а беа препознаени по името и презимето на тогаш осудените за случајот, за што имаше и пресуда на 180 страни, која ја имав. Селекција не може никој да направи зошто не може до крај да знае што се докази а што не. Ама кога ќе видите разговор на Фејзи Азири и друго лице знаете дека е еден од осудените, рече Заев.
Заев меѓу другото додаде дека имал повеќе средби со родителите на децата убиени крај Смилковско Езеро, затоа што тие сакаа да дознаат повеќе информации што се случило.
-На една од тие средби дел од родителите изразија сомневање дека институциите на системот, посебно правосудниот кријат одредени податоци. Поточно се работеше за 4 или 5 комуникации помеѓу тогаш осудени лица за кои што еден од тие разговори беше сокриен од нив од страна на ОЈО како службена тајна. Јас ги извадив истите комуникации и пред нив ги презентирав – рече Заев.
фото: Архива
