Премиерот Зоран Заев на трибината во Охрид, побара од граѓаните во сабота вечерта да размислат, што е најдобро за нивниот град. Според него, тоа е Костантин за градоначалник, а Стево за претседател. Заев верува дека охриѓани ќе донесат правилна одлука и нема да згрешат при изборот, бидејќи ВМРО-ДПМНЕ сакале само да дојдат на власт и ништо повеќе.
„Ниту Груевски, ниту Мицкоски, ниту Силјановска не се оградија од настаните на 27 април во Собранието. Тоа се случи оти не им се даваше власт и мандат. Затоа што знаеа дека само така можат да се спасат од криминалите. Овие луѓе не може да бараат поддршка од својот народ. Треба да се оградиш од тоа што е лошо и да понудиш концепт. Ние презедовме сериозни одлуки. На овој плоштад, од 1991 година, ветувале и НАТО и ЕУ, но еве денеска, ги исполнуваме нашите цели. Не беше лесно“, рече премиерот Заев.
Тој ги спомена Преспанскиот договор, дискусиите во Берлин, Меркел, Макрон и Могерини.
„Може да пукнат ако сакаат. Ова лето имаме одлука за почеток на преговори. Конечно исчекоривме. За кој ќе носите одлука за Груевски, Мицкоски, Силјановска? Или за триото Макрон, Могерини, Меркел, кои стојат позади нас?. Оваа борба е за тоа кој ќе го весла кајчето, за побрзо да не донесе на брегот. Треба стабилност и просперитет, а не да мрчи секој ден, не бива така“, додаде Заев.
