Појасот околу Велешко езеро ќе биде обновен, бидејќи тоа е обврска на сите институции. Ова го изјави премиерот Зоран Заев при посетата на велешкиот регион, кој беше зафатен со голем пожар во понеделникот.
Тој најави акција за пошумување на уништените површини со пари што ќе се обезбедат со ребалансот на буџетот, но и со поддршка од Светска банка.
„Чувствувам гнев, бидејќи е јасно дека ова се случило од човечка небрежност и неодговорност. Штетите и последиците се големи и долгорочни и затоа сме должни да извечеме поуки. По вакви катастрофи локалните самоуправи ќе мораат да ги менуваат приоритетите заедно со приоритетите на извршната власт. На врвот мора да биде безбедноста и здравјето на граѓаните и на животната средина. Владата ќе продолжи да го поддржува јакнењето на капацитетите на општините, а тие ќе треба да им посветат посебно внимание на противпожарните бригади и на другите сегменти за превнција од кризи“, рече Заев.
Прашан зошто сега се поставуваат вакви приоритети, а не претходно кога имало големи пожари, Заев одговори дека ова секогаш било приоритет, но во сиромашна држава се оди бавно.
Дека условите за работа на пожарникарите се лоши посочи и градоначалникот на Велес, Аце Коцевски.
