Загина 19-годишна девојка во судир меѓу автомобил и мотоцикл: Возачот на автомобилот имал 1,75 промили алкохол во крвта, а мотоциклистот немал возачка дозвола

Една 19-годишна девојка го загубила животот, а возачот на мотоциклот бил повреден во тешката сообраќајна несреќа што се случила синоќа на магистралниот пат Струмица–граничен премин Ново Село, кај Турново.

Несреќата се случила околу 23:30 часот, кога се судриле патничко возило „сеат леон“, управувано од 29-годишниот С.Б. од Струмица, и мотоцикл без регистарски ознаки, управуван од 19-годишниот А.Д. од Иловица.

— реклама —

Во судирот, 19-годишната К.Ј., сопатничка на мотоциклот, се здобила со тешки повреди и починала на местото на несреќата. Смртта ја констатирал лекар од Итната медицинска помош.

— реклама —

Возачот на мотоциклот се здобил со телесни повреди и бил пренесен во Медицинскиот центар во Струмица.

При увидот, кај возачот на „сеатот“ било извршено алкотестирање, при што биле измерени 1,75 промили алкохол во крвта. Тој бил лишен од слобода.

— реклама —

Полицијата дополнително утврдила дека мотоциклот не бил регистриран, а 19-годишниот возач го управувал возилото пред да се стекне со право на управување.

— реклама —

На местото извршиле увид јавен обвинител и увидна екипа од СВР Струмица. Поради несреќата, сообраќајот на патниот правец Струмица–граничен премин Ново Село кај Турново бил целосно во прекин од полноќ до 02:30 часот.

По наредба на јавен обвинител, телото на починатата било предадено на обдукција.