Загинатата 17-годишна девојка во несреќата кај Битола е Ивана Недановска – гимназијата се прости од својата ученичка

Седумнаесетгодишната девојка која го загуби животот во тешката сообраќајна несреќа на патот Битола–Прилеп е Ивана Недановска, ученичка во СОУ Гимназија „Јосип Броз Тито“ – Битола. Од неа денеска со потресна порака се простија нејзиното училиште, соучениците и наставниците.

„Смртта го прекинува животот, не и присуството“, порачаа од гимназијата, опишувајќи ја празнината што останува по прерано згаснатиот живот на нивната ученичка.

„Од денес, Ивана Недановска ја нема. И пред таа проста и страшна вистина стоиме немоќни сите ние од СОУ Гимназија ‘Јосип Броз Тито’ – Битола“, се вели во објавата.

— реклама —

Од училиштето пишуваат дека токму таму, каде што сè е насочено кон иднината, најтешко е да се прифати дека за еден млад човек утрешниот ден нема да дојде.

„Се учи за утре, се прават планови за утре, се расте за утре. Низ неговите ходници младоста минува брзо, понекогаш бучно и нестрпливо, уверена во она во што само младоста има право да биде уверена – дека има време. И токму затоа е толку страшно кога едно утре нема да дојде“, напишаа од гимназијата.

Ивана зад себе остава празно место во класот, меѓу другарите, наставниците и сите кои секојдневно ја среќавале во училиштето.

— реклама —

„Едно место. Еден глас. Едно име во дневникот. Едно лице меѓу многу млади лица. И дури кога едно од нив ќе исчезне, разбираме дека никогаш не било само едно меѓу многуте. Било свое. Единствено. Незаменливо“, стои во емотивното збогување.

Од гимназијата велат дека наставата и училишниот живот ќе продолжат, но дека местото на Ивана ќе остане засекогаш нејзино.

„Ќе дојде утро кога вратите на училиштето повторно ќе се отворат. Ќе дојдат учениците. Ќе продолжат часовите, разговорите, плановите, малите радости и грижи од кои е составен еден училиштен ден. Животот ја има таа сурова сила да продолжува и тогаш кога нам ни се чини дека би требало да застане.“

Учениците, наставниците, стручните служби, раководството и сите вработени во гимназијата изразија најдлабоко сочувство до семејството и најблиските на Ивана.

— реклама —

„Нашето училиште ќе продолжи да ја слави младоста, како што ја славело секогаш. Отсега ќе знае нешто повеќе за нејзината бесценетост. И ќе има едно празно место повеќе. А во него ќе сјае едно име што нема да биде празнина: Ивана Недановска“, порачаа од училиштето.

Како што претходно објави „Скопје1“, тешката сообраќајна несреќа се случила на 19 септември на патот Битола–Прилеп, кај местото викано „Туланата“.

Според информациите од МВР, несреќата била пријавена во 18:29 часот. Во неа учествувале „опел“, управуван од 28-годишниот Е.Ф. од прилепското село Канатларци, и „форд“, управуван од 48-годишниот М.Н. од Долно Српци, општина Могила.

Ивана била сопатничка во „опелот“ и починала на местото на несреќата. Смртта ја констатирал лекар од Итната медицинска помош во Битола.

Возачот на „опелот“, како и 44-годишна жена и седумгодишно дете кои биле сопатници во „фордот“, се здобиле со тешки телесни повреди, констатирани во Клиничката болница во Битола. Повреден бил и возачот на „фордот“.

Увид на местото извршила екипа на СВР Битола.