Загрижувачки раст на самоубиствата во Германија: Минатата година животот си го одзеле 11.334 лица

Бројот на самоубиства во Германија повторно бележи загрижувачки раст, по речиси четири децении во кои беше забележан тренд на опаѓање. Според официјалните податоци за 2025 година, животот си го одзеле 11.334 лица, што е за 964 случаи, односно 9,3 проценти повеќе во споредба со претходната година. Во просек, дневно умираат 28 лица од самоубиство, објави „Дојче веле“.

Анализата покажува дека најпогодена група се мажите на возраст од 55 до 65 години, особено оние родени во шеесеттите години од минатиот век. По оваа возрасна група бројот на случаи опаѓа, но повторно се зголемува кај лицата на возраст меѓу 80 и 90 години. Мажите се значително позастапени во сите возрасни групи и во 2025 година сочинувале 69,2 проценти од вкупниот број случаи. Истовремено, во последните години расте и бројот на самоубиства кај жените.

Самоубиствата сочинуваат околу 1,1 процент од сите причини за смрт во Германија, а нивниот број расте четврта година по ред. Трендот на опаѓање, кој траеше речиси четири децении, беше прекинат по 2021 година, кога беа регистрирани 9.215 случаи. За споредба, во 1981 година, кога бил забележан највисокиот број, животот си го одзеле 18.825 лица.

— реклама —

Националната програма за спречување самоубиства проценува дека во Германија годишно повеќе од 100.000 луѓе се обидуваат да си го одземат животот. Фондацијата за помош на лицата со депресија наведува дека станува збор за околу 500 обиди дневно.

Германското здружение за хумано умирање објавило дека 1.287 лица користеле услуги за организирана помош при умирање, што претставува 11,4 проценти од вкупниот број самоубиства. Ова прашање и понатаму предизвикува дебати во земјата.

— реклама —

Правната рамка се темели на одлуката на Сојузниот уставен суд од 2020 година, со која е потврдено правото на лицето да одлучува за сопствениот живот, под услов одлуката да произлегува од слободна волја, без надворешен притисок и да не е последица на тешка депресија. Во Германија е дозволено да се обезбеди средство и да се даде помош, но самиот чин мора да го изврши лицето. Според Фондацијата за помош на лицата со депресија и спречување самоубиства, бројот на вакви случаи се зголемил за 32 проценти по судската одлука.

Стручњаците нагласуваат дека зад самоубиството ретко стои само една причина. Најчесто станува збор за повеќе меѓусебно поврзани фактори, како губење на работата, финансиска несигурност, сиромаштија, трауматични искуства, загуба на блиски лица и социјална изолација.

Истражувањата покажуваат дека дел од луѓето што подоцна извршиле самоубиство претходно барале лекарска помош, но не стекнале впечаток дека некој може да им помогне. За многумина е тешко отворено да разговараат со лекар или терапевт за својата состојба, а стравот од стигматизација, присилно лекување и губење на социјалните контакти дополнително ги оддалечува од барањето поддршка.

— реклама —

Фондацијата за помош на лицата со депресија предупредува дека секоја најава за самоубиство треба да се сфати сериозно. Изјавите дека ништо повеќе нема смисла може да бидат знак дека лицето се наоѓа во тешка криза.

Стручњаците им советуваат на семејствата и пријателите да не се воздржуваат од разговор со лицата што минуваат низ тежок период, туку да им покажат дека се важни и дека не се сами. Наместо поедноставени уверувања дека сè ќе биде добро, поголема помош може да биде искрената поддршка и подготвеноста заедно да се побара решение.

Особено кај повозрасните лица, чувството дека се бескорисни или дека претставуваат товар за околината може да ја влоши нивната состојба. Според Светската здравствена организација, едно самоубиство во просек директно погодува шест блиски лица, а последиците ги чувствуваат и пошироката околина, колегите, медицинските работници и сведоците.

Германското Министерство за здравство во август претставило предлог-закон за спречување самоубиства, но критичарите сметаат дека предложените мерки не се доволни. Германската фондација за заштита на пациентите предупредува дека предвидените 1,4 милиони евра се далеку од потребните средства.

Како прва адреса за помош се посочува матичниот лекар, кој може да го упати пациентот кај психотерапевт или психијатар. Во Хрватска, според „Дојче веле“, постојат повеќе советувалишта за лица што се соочуваат со самоубиствени мисли, меѓу кои „Плави телефон“, Психолошкиот центар „ТЕСА“ и Центарот за кризна состојба и спречување самоубиства при Клиничкиот болнички центар во Загреб.