Македонската театарска сцена остана без една од своите најистакнати актерки. На 73-годишна возраст почина Тинка Ристеска, долгогодишна членка на Театарот „Антон Панов“ од Струмица, која зад себе остави повеќе од пет децении богата актерска кариера.
Од Струмичкиот театар соопштија дека Ристеска починала на 12 јули, истакнувајќи дека со нејзиното заминување македонската култура изгубила голем уметник и човек.
„Денес не се простуваме само од голема актерка. Се простуваме од дел од душата на Струмичкиот театар“, наведуваат од театарот.
Тинка Ристеска првпат застанала на сцената во 1969 година, на само 16-годишна возраст, со улогата на Донка во претставата „Бегалка“. Во текот на својата 55-годишна кариера одиграла повеќе од сто улоги и оставила силен печат во македонската театарска уметност.
Публиката ќе ја памети по улогите во претставите „Галеб“, „Стаклена менажерија“, „Магбет“, „Ромео и Јулија“, „Печалбари“, „Женидба“, „Крвави свадби“, „Тетовирани души“, „Бледица“, „Лет во место“, „Хамлет од Долно Гаштани“, „Чудо големо“ и „Вечна игра“.
И по пензионирањето во 2005 година остана активна на сцената. Во 2019 година одбележа 50 години актерска дејност, а во 2024 година и редок јубилеј – 55 години посветени на театарот. Освен во театарот, настапуваше и во телевизиски серии, ТВ-проекти и долгометражни филмови.
Погребот на Тинка Ристеска ќе се изврши на 14 јули во 12 часот, а посмртните останки ќе бидат изложени од 11 часот во Градската капела во Струмица.
