Билборди на кои се наоѓа ликот на претседателот на СДСМ, Зоран Заев и торбата „Луј Витон“ се запалени на повеќе локации. За претседателот на ВМРО-ДПМНЕ Христијан Мицкоски, поставените билборди не се оцрнување на кампањата, туку отсликување на реалната состојба во државата.
„Јас не знам, ако вистината го боли тогаш еве нека се разбере тоа како оцрнување“, рече Мицкоски.
Полицијата фати лица кои ги палат овие билборди, кажа Мицкоски.
Инаку во билтенот на МВР за ноќеска има информации за опожарени билборди на две локации во централното подрачје на Скопје.
Ноќеска во 2.20 часот во Бригадата за противпожарна заштита во Скопје било пријавено дека на булеварот „Митрополит Теодосиј Гологанов“ е опожарен билборд. Пожарникарите веднаш излегле на терен и го изгаснале пожарот. Во 1.35 часот во СВР Скопје било пријавено дека на улицата „Васил Ѓоргов“ е опожарен билборд. До билбордот е пронајдено шише во кое имало непозната течност.