Донација од САД, која се состои од заштитна медицинска опрема за борба против коронавирусот, примија денеска вицепремиерот Бујар Османи и министерот за здравство, Венко Филипче, во присуство на американската амбасадорка Кејт Мари Брнз.
„Исклучително сум задоволна што сум овде со вицепремиерот Османи и министерот Филипче во примопредавањето на оваа донација во името на САД. Оваа асистенција е уште еден начин на кој САД соработува со своите НАТО-сојузници и ЕУ-партнери, да бидат добри соседи и заедно да се справуваат со ковид-19. Материјалот што денеска го предаваме на министерството за здравство е наменет за заштита на медицинските работници кои се на првата линија во борбата со кризата. Сите ние ним им должиме огромна благодарност за нивните напори во спасувањето животи, третманот на болните и спречувањето на натамошното ширење на вирусот“ изјави Кејт Мари Брнз, Амбасадорка на САД во Северна Македонија.
„Еве нè денес на лице место каде се предава дел од онаа поголема најавена поддршка од над еден милион долари. Се работи за различна заштитна облека – маски, одела итн., кои се наменети за лекарите, за епидемиолозите и останатите здравствени работници. Оваа опрема им се става на располагање на Министерството за здравство и Институтот за јавно здравје, на кои секако им е најпотребна, имајќи предвид дека опремата ќе ја користат медицинските лица кои се првата одбрана на земјата од епидемијата“, истакна Османи, кој воедно изрази и благодарност до САД и до амбасадорката.
Министерот за здравство, Венко Филипче, заблагодарувајќи се за донацијата, за која истакна дека во овие моменти е неопходна за справувањето со коронавирусот во земјава, истакна дека истата значајно ќе им помогне на здравствените работници при извршувањето на работните обврски.
