Овогодишните високи температури во Германија се поврзуваат со околу 12.500 смртни случаи во периодот од 6 април до 2 август, покажуваат најновите проценки на Институтот „Роберт Кох“.
Од вкупниот проценет број, околу 9.600 смртни случаи биле регистрирани само во периодот од 22 до 28 јуни, кога на одделни места температурите надминале 41 степен Целзиусов.
Според Институтот „Роберт Кох“, 2026 година досега е рекордна според бројот на смртни случаи поврзани со високите температури. Претходниот рекорд бил забележан во 2018 година, кога според најновите проценки починале околу 9.400 луѓе.
Германскиот министер за животна средина, Карстен Шнајдер, повторно побара промени во Уставот со кои федералната влада би добила поголеми овластувања за спроведување мерки за заштита на населението од екстремни температури.
Тој посочи дека федералната влада во моментов може да им помага на општините во одредени случаи, но поради уставните ограничувања не може да финансира мерки како создавање сенка или отстранување асфалтирани и други непропустливи површини во градовите.
Шнајдер предлага заедничка надлежност на федералната влада и покраините, што би овозможило финансиска поддршка за градовите и општините при спроведување мерки за заштита од топлотните бранови. Идејата е веќе опфатена во коалицискиот договор на CDU, CSU и SPD.
