Пратеникот од ВМРО-ДПМНЕ, Игор Здравковски, во гостување во емисија на ТВ 24 изјави дека Владата презема конкретни мерки за заштита на стандардот на граѓаните и стабилизација на цените во земјоделството, меѓу кои и ограничувањето на маржите за вештачкото ѓубриво.
Здравковски посочи дека инфлацијата во земјава е во рамки што, според него, се прифатливи во услови на криза.
„Основните прехранбени производи, во најголем дел, имаат 5% стапка на ДДВ. Зборуваме за производи од брашно, млеко и други основни производи“, рече Здравковски.
Тој нагласи дека мерките поврзани со акцизите и ДДВ-то за нафтата помогнале да нема голем раст на цените, бидејќи енергенсите имаат значајно влијание врз трошоците.
„Во делот на земјоделието ги ограничивме маржите за вештачкото ѓубриво. Имаме директни и индиректни мерки кои ќе дадат резултат и во иднина“, изјави Игор Здравковски.
Тој додаде дека годинава се предвидени нови 25 милиони за поддршка на компаниите и економијата.
