Ѝ зел 117.000 денари претставувајќи се како вработен во Катастар – скопјанка открила во полиција како била измамена

Дваесет и четиригодишна скопјанка пријавила во полиција дека била измамена за 117.000 денари од две лица, од кои едното лажно се претставило како вработено во Катастарот и ѝ ветило помош за откуп и приватизација на државно земјиште што го користело нејзиното семејство.

— реклама —

Според информациите од Министерството за внатрешни работи, измамата била пријавена на 22 октомври во 14 часот во СВР Скопје.

— реклама —

Жената пријавила дека на 21 септември се сретнала со двете лица, кои ѝ ветиле дека ќе ѝ помогнат да ја заврши постапката за земјиштето. Едниот од нив се претставил како вработен во Катастарот, по што таа во неколку наврати му исплатила вкупно 117.000 денари.

Откако ги дала парите, скопјанката се обратила во Катастарот за да провери до каде е постапката. Таму, според нејзината пријава, ѝ било кажано дека лицето на кое му ги исплатила парите повеќе од две години не е вработено во институцијата.

— реклама —

Тогаш се посомневала дека е измамена и случајот го пријавила во полиција.

Од МВР информираат дека се преземаат мерки за расчистување на случајот и утврдување на сите околности.