Украинскиот претседател Володимир Зеленски повторно предупреди дека Украина нема доволно оружје за одбрана од руските балистички ракети, оценувајќи дека е „апсурдно“ што светското производство не ги задоволува потребите за заштита на населението.
Во своето вечерно видеообраќање, Зеленски изјави дека современиот свет располага со капацитет, но производството на одбранбени системи сè уште не е зголемено до нивото што е потребно.
„Едноставно е апсурдно што производството сè уште не е зголемено до нивото што навистина е потребно за заштита на луѓето од балистички терор“, рече тој.
Зеленски нагласи дека Украина има знаење и капацитет за производство на оружје и дека, доколку добие американски дозволи за системите „Патриот“, ќе може да произведува доволно не само за сопствените потреби туку и за своите сојузници.
Тој повторно предупреди дека Украина нема доволно пресретнувачки ракети за системите „Патриот“, поради што не успева да ги собори сите руски балистички проектили.
„Додека ракетите за системот „Патриот“ стојат во магацините на нашите сојузници, Русија добива отворен повик да продолжи да ги гаѓа станбените згради“, изјави Зеленски.
Во пресрет на Самитот на НАТО во Анкара, украинскиот претседател упати апел до САД и европските партнери да донесат конкретни одлуки за дополнително зајакнување на украинската противвоздушна одбрана.
„САД и Европа имаат доволно сила да го запрат овој терор“, порача Зеленски.
