Зеленски: Денеска му го вратив орденот на полскиот претседател

Украинскиот претседател Володимир Зеленски соопшти дека го вратил највисокото државно одликување што му беше доделено од Полска, откако полскиот претседател Карол Навроцки најави дека ќе му го одземе поради несогласувања околу толкувањето на историските настани од Втората светска војна.

Навроцки соопшти дека одлучил да му го одземе Орденот на Белиот орел, највисокото полско државно одликување, откако Зеленски кон крајот на мај донел одлука една украинска воена единица да го носи името на Украинската востаничка армија (УПА).

— реклама —

Во Полска, УПА се смета за одговорна за смртта на повеќе од 100.000 Полјаци за време на Волинските масакри во текот на Втората светска војна, додека дел од Украинците ја сметаат организацијата за симбол на борбата за независност од Советскиот Сојуз.

„Верувавме дека Орденот на Белиот орел, доделен во 2023 година, беше признание за украинскиот народ и за нашата војска. Така ни беше кажано тогаш. Денес го испратив назад на полскиот претседател“, напиша Зеленски на социјалната мрежа Икс.

— реклама —

Украинскиот претседател објави и фотографија од орденот спакуван во кутија пред неговото испраќање во кабинетот на полскиот претседател.

Тој нагласи дека Украина останува благодарна за полската поддршка и дека Киев е подготвен за понатамошна соработка со Варшава со цел да се избегнат различни толкувања на болните историски прашања.

— реклама —

Дополнителни тензии предизвика и одлуката на шефот на кабинетот на Зеленски, Кирило Буданов, кој соопшти дека се откажува од полското одликување што му било доделено минатата година, оценувајќи го потегот на Навроцки како „подарок за Русија“.

Украинскиот министер за надворешни работи Андриј Сибиха ја нарече одлуката на полскиот претседател „стратешка грешка“ и порача дека ниту еден странски лидер нема да ѝ ја диктира историјата на Украина.

— реклама —

Полскиот премиер Доналд Туск, пак, повика на смиреност и воздржаност од двете страни.

И покрај новите несогласувања, Варшава останува еден од најважните сојузници на Киев во војната со Русија, иако во последните години односите меѓу двете земји се оптоварени со историски спорови и други билатерални прашања.