Зеленски е подготвен лично да разговара со Путин за територијалните прашања

Украинскиот претседател Володимир Зеленски е подготвен директно да разговара со рускиот претседател Владимир Путин за територијалните прашања со цел да се стави крај на војната, изјави украинскиот министер за надворешни работи Андриј Сибиха, пренесува „Киев пост“.

Сибиха во интервју за финскиот весник „Хелсингин саномат“, по дводневната посета на Финска, потврди дека Киев координирал телефонски разговор меѓу Путин, финскиот претседател Александер Стуб и норвешкиот премиер Јонас Гар Стере. Нордиските лидери му пренеле на рускиот претседател две клучни пораки – барањето на Украина за прекин на огнот и предлогот за директна средба меѓу Зеленски и Путин.

— реклама —

„Ние ја сакаме таа средба и подготвени сме за неа. Веројатно само средба меѓу Зеленски и Путин може да донесе напредок во преговорите. Зеленски е подготвен да разговара за најтешките и најчувствителните теми, вклучително и за територијалното прашање“, изјави Сибиха.

Тој додаде дека директните разговори би можеле да отворат пат и за мерки за градење доверба, како размена на заробеници и враќање на украинските деца кои, според Киев, Русија ги однела. За Украина не е пресудно каде ќе се одржи средбата, под услов тоа да не бидат Москва или Белорусија. Сибиха на шега ја исклучил и Северна Кореја, а рускиот повик Зеленски да ја посети Москва го оценил како несериозен.

— реклама —

Украинскиот министер оценил дека иницијативата на нордиските лидери претставува чекор напред во мировните напори и изразил надеж дека комуникацискиот канал со Путин ќе остане отворен. Тој најави и дека во ноември во Абу Даби се очекува продолжување на трилатералните разговори меѓу Украина, САД и Русија, кои, според него, ќе покажат дали Москва има сериозна намера да ја заврши војната по дипломатски пат.

— реклама —

Сибиха ја нагласил потребата Европа да преземе посилна улога во преговорите и да настапи единствено. Според него, блиските односи на финскиот претседател Стуб со Трамп и Зеленски му овозможиле да има значајна улога во дипломатските напори.

Тој изразил загриженост дека администрацијата на Трамп се приближува кон исполнување на руските барања, наведувајќи го американскиот притисок за промена на украинското раководство, ублажувањето на санкциите и обновеното купување руски дизел од страна на САД. Сепак, нагласил дека Вашингтон мора да остане вклучен во процесот, бидејќи без американско учество не е реално да се постигне крај на војната или да се обезбедат вистински безбедносни гаранции за Украина.

Како дополнителна причина за дипломатските иницијативи, Сибиха ги посочил засилените руски напади. Според неговите податоци, Русија во последните две недели истрелала 100 балистички ракети кон Украина.

Во меѓувреме, Москва продолжува да инсистира евентуалната средба да се одржи во Русија. Портпаролот на Кремљ, Дмитриј Песков, не ја исклучил можноста за разговори, но нагласил дека тие бараат темелна подготовка. Зеленски претходно предложил средба со Путин во декември, на маргините на самитот на Г20 во САД, но Песков ја отфрлил таа можност и повторно го упатил украинскиот претседател да ја прифати поканата за Москва. Зеленски, пак, претходно предложил средба во неутрална земја, со пошироки европски и американски безбедносни гаранции, но Кремљ го одбил предлогот.