Зеленски го загуби трпението, остро ги нападна Американците

Украинскиот претседател Володимир Зеленски остро ги критикуваше САД поради, како што оцени, недоволниот притисок врз Русија да прифати мировни преговори. Тој порача дека Вашингтон има можност да го натера Владимир Путин да седне на преговарачка маса, но дека за тоа недостига политичка волја.

Зеленски зборуваше за време на посетата на украинскиот град Прилики, кој претходно беше цел на смртоносен руски напад. Неговите изјави уследија откако американскиот државен секретар Марко Рубио оцени дека војната во Украина достигнала опасен ќор-сокак.

— реклама —

Украинскиот претседател ја отфрли таквата оценка и порача дека проблемот не е во дипломатскиот процес, туку во недостигот на волја.

„Не сме во дипломатски ќор-сокак. Уништете ја целата економија на Путин, замолчете ја Русија и воведете санкции против нејзиното оружје“, порача Зеленски.

— реклама —

Тој побара од САД да ги засилат санкциите против Русија и да ѝ овозможат на Украина поширок пристап до сателитскиот систем Starlink, со цел поефикасно да се справува со руските ракетни закани.

Зеленски оцени дека европските земји сами не можат да го принудат Путин на преговори, но дека САД имаат поголема можност за тоа.

„Верувам дека претседателот Трамп може да направи повеќе и, искрено, треба да направи повеќе, со оглед на огромните загуби“, рече Зеленски.

— реклама —

Американскиот државен секретар Марко Рубио, пак, изјави дека Вашингтон и натаму е посветен на изнаоѓање дипломатско решение за војната. Тој предупреди дека продолжувањето на ескалацијата може да доведе до проширување на конфликтот и во други европски земји, вклучително и членки на НАТО.

Критиките на Зеленски доаѓаат во период кога, според Reuters, американски и руски претставници разговараат за можноста американски инвеститори да бидат вклучени во гасоводите Северен тек. Белата куќа негираше дека во последно време имало такви разговори.

Зеленски своите критики ги упати по серија смртоносни руски напади врз украински градови. Според неговите податоци, во нападите во текот на два дена загинале 78 лица, а 215 биле повредени.

И покрај критиките кон Вашингтон, Зеленски потврди дека украински преговарачи во петок и сабота ќе престојуваат во САД на нови разговори. Тој повторно го повика Трамп да изврши поголем притисок врз Русија за да се отвори пат кон завршување на војната.