Зеленски: И јас можам да му нацртам мапа на Путин, на која целосно ја окупирам Русија

По првиот ден од трилатералните преговори во Абу Даби, украинскиот претседател Володимир Зеленски соопшти дека руската делегација тврдела оти веќе контролира половина од делот на Донбас кој сè уште е под украинска контрола.

— реклама —

Според Зеленски, украинските преговарачи ги отфрлиле овие тврдења, посочувајќи дека располагаат со снимки, фотографии и други докази кои ја потврдуваат контролата на Украина врз тие подрачја.

Русија контролира голем дел од Донбас, но во досегашните преговори бара целиот регион да ѝ биде отстапен во рамките на евентуален мировен договор. Украина досега се спротивставува на таквото барање.

— реклама —

Зеленски оцени дека рускиот претседател Владимир Путин има поинаква претстава за состојбата на теренот и дека на американската страна ѝ пренесува оти Русија би можела целосно да го освои источниот дел на Украина во рок од еден до три месеци.

— реклама —

Украинскиот претседател додаде дека американскиот генерал Алексус Гринкевич, врховен командант на сојузничките сили на НАТО во Европа, кој учествувал на состанокот, потврдил дека украинските карти за состојбата на фронтот повеќе одговараат на реалната ситуација.

Една од темите на разговорите била и можноста за голема размена на воени заробеници. Според Зеленски, се разговарало за размена на 1.000 за 1.000, па дури и на 1.500 за 1.500 заробеници. Тој најави дека американски претставници ќе отпатуваат во Русија, каде што една од главните теми ќе биде токму ова прашање.

— реклама —

Меѓу останатите теми на преговорите биле и членството на Украина во НАТО и Европската Унија. За вториот ден од разговорите се најавени дискусии за намалување на тензиите, енергетиката, безбедносната состојба во Црното Море и можноста за одржување трилатерална средба на највисоко државно ниво.